Spjallið er ætlað öllum þeim sem hafa spurningar varðandi ofbeldi í nánum samböndum. Þolendur sem til okkar leita eru ýmist  enn í ofbeldissambandi, hafa þegar slitið sambandi við ofbeldisaðilann eða eru ekki viss hvort um ofbeldi er að ræða. Spjallið er einnig fyrir þau sem hafa áhyggjur af aðstandenda í ofbeldissambandi.
Þú kemur inn á spjallið á eigin forsendum og þarft ekki að gefa upp nafn né aðrar persónuupplýsingar.

Aðstæður geta verið þannig að það er erfitt að tala í símann. Á netinu getur þú spurt okkur spurninga og við spjallað um það sem þú ert að ganga í gegnum. Þú gætir verið í ofbeldissambandi eða búin að slíta sambandinu en ofbeldið heldur enn áfram. Kannski ertu ekki viss hvort um ofbeldi er að ræða. Hverjar sem aðstæður þínar eru,  þá erum við hér fyrir þig. Ráðgjafar Kvennaathvarfsins geta veitt stuðning, ráðgjöf og upplýsingar varðandi næstu skref og bent á ýmis úrræði.

Spjallið er öruggur vettvangur og er trúnaðarmál. Við munum ekki deila neinum upplýsingum sem þú gefur okkur. Aðeins þú og ráðgjafi Kvennaathvarfsins geta lesið innihald skilaboðanna sem eru send. Mikilvægt er þó að hafa í huga að sumir gerendur ofbeldis finna leiðir til að fylgjast með því sem þolendur þeirra eru að gera á netinu í „rauntíma“ til dæmis með því að setja upp njósnaforrit í síma eða tölvu. Ef þig grunar að einhver annar geti séð hvað þú ert að gera í tækinu sem þú ert að nota, ættir þú ekki að nota spjallþjónustuna. Í staðinn skaltu hringja í okkur í síma 561 1205, úr síma sem þú veist að er öruggur.

Ef þú þarft snögglega að hætta spjallinu skaltu smella á Loka/Close hnappinn fyrir miðju, hægra megin á skjánum þínum. Spjallið mun lokast og fara aftur á heimasíðu Google.

Við notum ekki persónugreinanleg gögn og starfsfólkið okkar er bundið trúnaði.

Við vinnum með persónuupplýsingar í samræmi við lög nr. 90/2018 um persónuvernd og vinnslu persónuupplýsinga. Engar spjallskrár eru geymdar. Að öðru leyti er farið að GDPR regulgerðum skv. lögum.