Aðstæður geta verið þannig að það er erfitt að tala í símann. Á netinu getur þú spurt okkur þeirra spurninga sem þú vilt og við spjallað um það sem þú ert að ganga í gegnum. Við munum ekki dæma þig eða segja þér hvað þú átt að gera. Það skiptir ekki máli hvort þú ert enn með þeim sem þú vilt tala við okkur um. Þú gætir jafnvel hafa slitið sambandinu fyrir mörgum árum. Kannski ertu ekki viss hvort um ofbeldi er að ræða. Hverjar sem aðstæður þínar eru, erum við hér fyrir þig. Ráðgjafar Kvennaathvarfsins geta veitt stuðning, ráðgjöf og upplýsingar varðandi næstu skref og bent á ýmis úrræði.
Ef þú þarft að yfirgefa heimili þitt vegna ofbeldis, vinsamlegast hringdu í okkur, hvenær sem er sólarhrings, í síma 561 1205. Ef um neyðartilvik er að ræða, hringdu í 112.

Spjallið er öruggur vettvangur og er trúnaðarmál. Við munum ekki deila neinum upplýsingum sem þú gefur okkur. Aðeins þú og ráðgjafi Kvennaathvarfsins geta lesið innihald skilaboðanna sem eru send. Mikilvægt er þó að hafa í huga að sumir gerendur ofbeldis finna leiðir til að fylgjast með því sem þolendur þeirra eru að gera á netinu í „rauntíma“ til dæmis með því að setja upp njósnaforrit í síma eða tölvu. Ef þig grunar að einhver annar geti séð hvað þú ert að gera í tækinu sem þú ert að nota, ættir þú ekki að nota spjallþjónustuna. Í staðinn skaltu hringja í okkur í síma 561 1205, úr síma sem þú veist að er öruggur.

Ef þú þarft snögglega að hætta spjallinu skaltu smella á Loka/Close hnappinn fyrir miðju, hægra megin á skjánum þínum. Það mun loka og fara aftur á heimasíðu google.